A beautiful 8-verse stotra depicting many qualities of Lord Vishnu.

कैवल्या अष्टकम

मधुरं मधुरेभ्योऽपि, मंगलेभ्योऽपि मंगलम् ।

पावनं पावनेभ्योऽपि, हरेर्नामैव केवलम् ।।1।।

आब्रह्मस्तम्बपर्यन्तं, सर्वं मायामयं जगत् ।

सत्यं सत्यं पुन: सत्यं, हरेर्नामैव केवलम् ।।2।।

स गुरु: स पिता चापि, सा माता बांधवोऽपि स: ।

शिक्षयेच्चेत्सदा स्मर्तुं, हरेर्नामैव केवलम् ।।3।।

नि: श्वासे न हि विश्वास:, कदा रुद्धो भविष्यति ।

कीर्तनीयमतो बाल्याद्धरेर्नामैव केवलम् ।।4।।

हरि: सदा वसेत्तत्र, यत्र भागवता जना: ।

गायन्ति भक्तिभावेन, हरेर्नामैव केवलम् ।।5।।

अहो दुखं महादुखं, दुखाद् दुःखतरं यत: ।

काचार्थं विस्मृतं रत्नं, हरेर्नामैव केवलम् ।।6।।

दीयतां दीयतां कर्णो, नीयतां नीयतां वच: ।

गीयतां गीयतां नित्यं, हरेर्नामैव केवलम् ।।7।।

तृणीकृत्य जगत्सर्वं, राजते सकलोपरि ।

चिदानन्दमयं शुद्धं, हरेर्नामैव केवलम् ।।8।।