The Pandurangashtakam is a devotional hymn dedicated to Lord Panduranga, a form of Lord Krushna who is worshipped primarily in the state of Maharashtra, India. Lord Panduranga, also known as Vithoba or Vitthal, is the presiding deity of the famous temple in Pandharpur.
पाण्डुरन्गाष्टकं
महायोगपीठे तटे भीमरथ्यां
वरं पुण्डरीकाय दातुं मुनीन्द्रैः ।
समागत्य तिष्ठन्तमानन्दकन्दं
परब्रह्मलिङ्गं भजे पाण्डुरङ्गम् ॥१॥
तडिद्वाससं नीलमेघावभासं
रमामन्दिरं सुन्दरं चित्प्रकाशम् ।
वरं त्विष्टिकायां समन्यस्तपादं
परब्रह्मलिङ्गं भजे पाण्डुरङ्गम् ॥२॥
प्रमाणं भवाब्धेरिदं मामकानां
नितम्बः कराभ्यां धृतो येन तस्मात् ।
विधातुर्वसत्यै धृतो नाभिकोशः
परब्रह्मलिङ्गं भजे पाण्डुरङ्गम् ॥३॥
स्फुरत्कौस्तुभालङ्कृतं कण्ठदेशे
श्रिया जुष्टकेयूरकं श्रीनिवासम् ।
शिवं शान्तमीड्यं वरं लोकपालं
परब्रह्मलिङ्गं भजे पाण्डुरङ्गम् ॥४॥
शरच्चन्द्रबिम्बाननं चारुहासं
लसत्कुण्डलाक्रान्तगण्डस्थलाङ्गम् ।
जपारागबिम्बाधरं कञ्जनेत्रं
परब्रह्मलिङ्गं भजे पाण्डुरङ्गम् ॥५॥
किरीटोज्ज्वलत्सर्वदिक्प्रान्तभागं
सुरैरर्चितं दिव्यरत्नैरनर्घैः ।
त्रिभङ्गाकृतिं बर्हमाल्यावतंसं
परब्रह्मलिङ्गं भजे पाण्डुरङ्गम् ॥६॥
विभुं वेणुनादं चरन्तं दुरन्तं
स्वयं लीलया गोपवेषं दधानम् ।
गवां वृन्दकानन्ददं चारुहासं
परब्रह्मलिङ्गं भजे पाण्डुरङ्गम् ॥७॥
अजं रुक्मिणीप्राणसञ्जीवनं तं
परं धाम कैवल्यमेकं तुरीयम् ।
प्रसन्नं प्रपन्नार्तिहं देवदेवं
परब्रह्मलिङ्गं भजे पाण्डुरङ्गम् ॥८॥
स्तवं पाण्डुरङ्गस्य वै पुण्यदं ये
पठन्त्येकचित्तेन भक्त्या च नित्यम् ।
भवाम्भोनिधिं तेऽपि तीर्त्वान्तकाले
हरेरालयं शाश्वतं प्राप्नुवन्ति ॥९॥
Pandurangashtakam
mahāyōgapīṭhē taṭē bhīmarathyā
varaṃ puṇḍarīkāya dātuṃ munīndraiḥ ।
samāgatya tiṣṭhantamānandakandaṃ
parabrahmaliṅgaṃ bhajē pāṇḍuraṅgam ॥ 1 ॥
taṭidvāsasaṃ nīlamēghāvabhāsaṃ
ramāmandiraṃ sundaraṃ chitprakāśam ।
varaṃ tviṣṭakāyāṃ samanyastapādaṃ
parabrahmaliṅgaṃ bhajē pāṇḍuraṅgam ॥ 2 ॥
pramāṇaṃ bhavābdhēridaṃ māmakānāṃ
nitambaḥ karābhyāṃ dhṛtō yēna tasmāt ।
vidhāturvasatyai dhṛtō nābhikōśaḥ
parabrahmaliṅgaṃ bhajē pāṇḍuraṅgam ॥ 3 ॥
sphuratkaustubhālaṅkṛtaṃ kaṇṭhadēśē
śriyā juṣṭakēyūrakaṃ śrīnivāsam ।
śivaṃ śāntamīḍyaṃ varaṃ lōkapālaṃ
parabrahmaliṅgaṃ bhajē pāṇḍuraṅgam ॥ 4 ॥
śarachchandrabimbānanaṃ chāruhāsaṃ
lasatkuṇḍalākrāntagaṇḍasthalāntam ।
japārāgabimbādharaṃ kañjanētraṃ
parabrahmaliṅgaṃ bhajē pāṇḍuraṅgam ॥ 5 ॥
kirīṭōjjvalatsarvadikprāntabhāgaṃ
surairarchitaṃ divyaratnairanarghaiḥ ।
tribhaṅgākṛtiṃ barhamālyāvataṃsaṃ
parabrahmaliṅgaṃ bhajē pāṇḍuraṅgam ॥ 6 ॥
vibhuṃ vēṇunādaṃ charantaṃ durantaṃ
svayaṃ līlayā gōpavēṣaṃ dadhānam ।
gavāṃ bṛndakānandadaṃ chāruhāsaṃ
parabrahmaliṅgaṃ bhajē pāṇḍuraṅgam ॥ 7 ॥
ajaṃ rukmiṇīprāṇasañjīvanaṃ taṃ
paraṃ dhāma kaivalyamēkaṃ turīyam ।
prasannaṃ prapannārtihaṃ dēvadēvaṃ
parabrahmaliṅgaṃ bhajē pāṇḍuraṅgam ॥ 8 ॥
stavaṃ pāṇḍuraṅgasya vai puṇyadaṃ yē
paṭhantyēkachittēna bhaktyā cha nityam ।
bhavāmbhōnidhiṃ tē’pi tīrtvāntakālē
harērālayaṃ śāśvataṃ prāpnuvanti ॥ 9 ॥
