Chhappa (Chopai) | છપ્પા (ચોપાઈ) – by Shamal

વાડ થઈને ચિભડાં ગળે, સોંઘી વસ્તુ ક્યાંથી મળે?

ખળું ખાતું હોય જો અન્ન, તો જીવે નહિ એકે જંન. ૧

કલ્પવૃક્ષ જો કેરી ખાય, તેનો ચોર ન પેદા થાય;

નવાણ પીતું હોયે નીર, જીવજંતુ ક્યમ ધરે શરીર. ૨

મા મારે પય પીતાં બાળ, સત્યવાદી જો બોલે આળ;

રાજા થઈને લૂટી લેય, પ્રજા કોણ આગળ જઈ કહેય. ૩

રામ જપંતા નર્કે જશે, કહો કલ્યાણ જ કોનું થશે;

પિતા પુત્રીશું રમશે જાર, તે વાતનો કો પ્રીછે પાર. ૪

ગંગા નહાતાં પાપી થશે, વેદવચન કેમ સાચાં હશે;

વાહાર ત્યાંથી આવે ધાડ, તો પછી ક્યાંની કરશું આડ. પ

મેઘ વરસંતા પથ્થર પડે, તેનો વાંક કોને શિર ચડે;

ધણીને વિખ દે ઘરની નાર, કોણ સાચવે તેણે ઠાર. ૬

પુષ્પહાર થઈ વળગે સાપ, ત્યાં તે કોણ જાળવશે આપ;

અમૃત જાણી આપે પીજીએ, વિખ થાય દોષ કોને દીજીએ. ૭

કુંડળ કરડી ખાએ. કાન, કોણ આગળ. જઈ કરિયે જાણ;

ચંદન જાણી ધરીએ આપ, થાય અગ્નિ તો પુરણ પાપ. ૮

– શામળ